خاصخيلي، جان

خاصخيلي، جان: نامور صحافي ۽ ليکڪ جان خاصخيليءَ جو پورو نالو جان محمد ولد حاجي خاصخيلي آهي. هن 23 اپريل 1956ع تي تعلقي هالا جي ڳوٺ ڪرم خان نظاماڻيءَ ۾ جنم ورتو. سندس تعليمي لياقت ايم. اي (سوشيالاجي) آهي. شاعريءَ سان گڏ ڪهاڻيون به لکندو آهي. سندس شاعري ’ڏيئا ڏيئا لاٽ اسان‘ ڪتاب ۾ به تعارف سان ڇپيل آهي، جنهن ڪتاب جو تفصيلي مهاڳ شيخ اياز لکيو هو ۽ ان ڪتاب ۾ نئين ٽهيءَ جي شاعرن جو انتخاب شامل هو. جان خاصخيلي جي ڪهاڻين جو مجموعو ’گم ٿيل ماڻهوءَ جو سفرنامو‘ 1996ع ۾ ڇپيو. سنڌي ادبي سنگت ڪراچيءَ شاخ جو ڪيترا ڀيرا سيڪريٽري رهي چڪو آهي. ڪراچي پريس ڪلب، ڪراچي يونين آف جرنلسٽس، ۽ آرٽس ڪائونسل آف ڪراچيءَ جو ميمبر رهيو آهي. سنڌي صحافت ۾ هلال پاڪستان، عوامي آواز، برسات، جاڳو، پڪار ۽ خلق اخبارن سان واڳيل رهيو آهي. انگريزي اخبارن- ٽائيمس آف انڊيا، ڊان، نيوز لائين، هيرالڊ، ورلڊ نيٽ ڊيلي (آمريڪا) وغيره ۾ سندس ليک ۽ نيوز اسٽوريون پڻ شايع ٿيون آهن. هن وقت انگريزي اخبار ’دي نيوز‘ سان لاڳاپيل آهي.

داخلا ۾ استعمال ٿيل تاريخون

1956.04.23  عيسوي

نامور صحافي ۽ ليکڪ جان خاصخيليءَ جو پورو نالو جان محمد ولد حاجي خاصخيلي آهي. هن 23 اپريل 1956ع تي تعلقي هالا جي ڳوٺ ڪرم خان نظاماڻيءَ ۾ جنم ورتو.

صحافي - ڀاڱي جون ٻِيون داخلائون